Bainvegni

Peider Lansel (1863-1943) è stà in dals pli impurtants exponents da la «renaschientscha rumantscha», dal moviment per la lingua, la litteratura e la patria rumantscha. El è s'engaschà sco poet, essaist ed activist durant quasi tut sia vita per il mantegniment e la renconuschientscha dal rumantsch. Durant passa trenta onns ha el publitgà in grond numer da collecziuns da poesias, divers essais e referats e tgirà differentas ediziuns da lirica e prosa rumantscha. Per ses grond engaschament per la lingua e cultura rumantscha è el vegnì onurà da l’Universitad da Turitg cun il «doctor honoris causa», per sia ovra litterara ha el survegnì il grond premi da la Fundaziun Schiller.
 
En il rom d’in project d’ediziun da l’Institut grischun per la perscrutaziun da la cultura e da la Fundaziun Not Vital Sent èn vegnids edids sia ritga ovra essaistica, sia prosa, tscherts artitgels da gasetta e parts da sia correspundenza.
Il tom I da las «Ouvras da Peider Lansel» che cuntegna sia lirica è cumparì dal 1966 en ina ediziun tgirada dad Andri Peer. Passa quarant'onns suenter ha la Chasa Editura Rumantscha publitgà la fin mars 2012 il tom II en ina ediziun tgirada da Rico Valär.

Questa pagina infurmescha davart il project d’ediziun e dat ina survista da las ovras e dal relasch da Peider Lansel. Per dumondas ed ulteriuras infurmaziuns stain nus gugent a disposiziun.

institut für kulturforschung

fundaziun not vital

fundaziun planta

memoriav