Registraziuns

En la biblioteca da la Fundaziun de Planta Samedan sa chattan 75 cilinders da tschaira ed in fonograf da la firma americana Edison. Lansel ha cumprà ses fonograf enturn il 1910 a Genevra ed ha duvrà el tranter il 1912 ed il 1915 per far registraziuns da chanzuns popularas ladinas en Engiadina, Val Müstair ed a Bravuogn.
Lansel ha registrà sin questas registraziuns che tutgan tar las pli veglias registraziuns sin il champ en Svizra passa 300 chanzuns popularas. El aveva avant l’ediziun d’in cudesch da chanzuns popularas cun notas e texts. Quest project “Allegra!” n’è displaschaivlamain mai vegnì realisà. Igl èn dentant avant maun notaziuns da las chanzuns registradas che Lansel ha laschà far a l’organist da Genevra Charles Faller. Peider Lansel e sia figlia Erica han era transcrit ina part da las chanzuns registradas cun il fonograf.

Las chanzuns èn vegnidas digitalisadas cun ils sustegn da MEMORIAV en zercladur 2007 da la fonoteca naziunala a Lugano. La qualitad da las registraziuns n’è betg fitg buna, gia che Lansel ha adina puspè laschà tadlar a ses public las chanzuns, quai che ha consumà la tschaira dals cilinders e cun quai diminuì la lur qualitad.

Ussa pon ins far cumadaivlamain retschertgas tenor temas u titels sin la banca da datas da la fonoteca.

Ina glista alfabetica da las chanzuns popularas identifitgadas sin ils cilinders chattan ins qua (pdf).


Interessantas sinergias e bunas pussibilitads per retschertgas cuminaivlas datti cun il project da l’Institut per la perscrutaziun da la cultura grischuna «Collecziun da chanzuns popularas rumantschas dad Alfons Maissen».
Alfons Maissan ha registrà e documentà en ils onss 1930-1060 detagliadamain passa 1400 chanzuns popularas rumantschas da tut il Grischun rumantsch (surtut da la Surselva) sin plattas de schelatina e bindels sonors. Il scienzià e musicist Iso Albin perscrutescha e cataloghisescha pel mument quest relasch voluminus. Ils dus relaschs, quel da Lansel e quel da Maissan, sa cumpletteschan cronologicamain e geograficamain. Uschè pon ins spetgar che retschertgas cuminaivlas cun tut il material che stat a disposiziun possian procurar resultats fundads areguard la cultura dal chant popular rumantsch.